“நீ எங்கேயிருந்து வந்தவன்?” என்றும் “உன்னைச் சிலுவையில் அறைய எனக்கு அதிகாரம் உண்டு.....” என்றும் கூறியதைக் கேட்ட இயேசு “பரத்திலிருந்து உமக்கு கொடுக்கப்படாதிருந்தால், என்மேல் உமக்கு ஒரு அதிகாரமும் இராது!” என கெம்பீரமாய் உரைத்தார்! (யோவான்.19:9-11).

இந்த உலகத்தைத் தங்கள் ராஜ்யமாய் கொண்டவர்கள், இவ்வுலக அதிகாரங்களுக்கே நேரடியாக கீழ்ப்பட்டிருக்கிறார்கள்! அதைத்தான் கவர்னர் பிலாத்தும் சரியாய் கூறினார்! ஆனால் இயேசுவோ “என் இராஜ்யம் இவ்வுலகத்திற்குரியதல்ல” என அறிவித்து, தன் மீது உடனடியான அதிகாரம் பரத்திலிருந்துதான் முதலாவது வரவேண்டும்...... அதன் பின்புதான், கவர்னராகிய உம்மிடம் அது வரமுடியும்! என ஆணித்தரமாய் உரைத்து “தான் எங்கேயிருந்து வந்தவர்” என்பதை இவ்வுலக ராஜ்ய கவர்னர் விளங்கும்படி சாட்சி உரைத்தார்.

“நான் எங்கேயிருந்து வந்தேன் என்றும், எங்கே போகிறேனென்றும் அறிந்திருக்கிறேன்” (யோவான்.8:14) என்ற இயேசுவின் சாட்சியை ஆணித்தரமாய் கூறுபவர்களே, இயேசு காட்டிய பாதையில் அவரைப் பின்பற்றிட முடியும்!