இரட்சிக்கப்பட்டு, இயேசுவின் உண்மை சீஷனாய் மாறிவிட்ட ஒருவனே, விண்ணிற்குரியவன்! குருவின் அடிச்சுவட்டை பின்பற்றத் துவங்கிய நாள் தொடங்கி... அவனது மாறாத இலக்காய் இருப்பதெல்லாம், கிறிஸ்துவையே அடைந்திட வேண்டும்! அவரது சாயல் அணிந்திட வேண்டும்! என்ற இலக்கு மாத்திரமே ஆகும்! தன்னைச் “சுற்றியுள்ள பாவம், மற்றும் தனக்குண்டான யாவற்றையும் உதறித் தள்ளாமல்” இந்த இலக்கின் பாதை ஓடிட இயலாது.... ஆம், முற்றிலும் அர்ப்பணித்து விட்ட சீஷனாகாமல் அந்த ‘ஓட்டம்’ சித்தி பெறாது!

உலகத்தின் யாவற்றையும் நஷ்டம் என உதறிய அனேகர்.... மீண்டும் திரும்பிவந்து, அதை லாபமாக்கி ‘பின்மாறிய மாந்தர்கள்’ ஏராளம்! ஆனால், ஆதாயமாய் கருதப்படும் இந்த உலகத்தை நஷ்டமாய் மாத்திரம் எண்ணாமல்.... அதை ‘குப்பையாகவும்’ உதறியவர்கள் மாத்திரமே இலக்கை நோக்கி “ஆசையாய் தொடர்ந்து” கிறிஸ்துவையும், அவரது சாயலையும் அடைவர்! (பிலி.3:12,14). ஆம், தங்கள் இலக்கை நோக்கித் தொடரும் ஓட்டத்தை, பரிசுத்த ஆவியின் துணையோடு ஜெயமே ஜெயமென முடிப்பார்!