வாலிப பெண்ணே, உன்மீது இயேசு கரிசனையாய் உள்ளார்!

  ரூத் என்ற மோவாபிய விதவையின் வம்சாவழியில் ஆண்டவராகிய இயேசு பிறந்தார், என்பது உங்களுக்குத் தெரியுமா? இயேசு ஒருபோதும் ‘பெண் குலத்தை’ குறைத்து மதிப்பிட்டதோ அல்லது புறக்கணித்ததோ இல்லை! மாறாக, அவர்களை தமது ஊழியத்தில் கனப்படுத்தி வாழ்ந்தார்! 

 மனுமக்களின் பாவம் போக்க மானிடனாக அவதரித்த, அன்பின் தேவகுமாரன், தான் சிசுவாக இருந்தபோது, ஒரு கன்னிப் பெண்ணின் அரவணைப்பில் அமுதுண்டு வளர்ந்தார்! ஆம், கன்னியின் கர்ப்பத்தை அவர் அருவருக்கவில்லை! இயேசு தன் ஊழியத்தில், பெண் மக்களுக்கு அதிக இடம் கொடுத்தார்! அவருடன் அநேக ஸ்திரீகள் ஊழியத்திலே இருந்ததாக தேவனுடைய வார்த்தை கூறுகின்றது (லூக்கா 3:8). பெண் குலத்தின் சுகத்தையும், சந்தோஷ சமாதானத்தையும் நேச இரட்சகர் மனதார விரும்பினார் என்பதை “உன் வேதனை நீங்கி சுகமாயிரு” (மாற்கு 5:34) என்று ‘தன்னைத் தொட்ட பெரும்பாடுள்ள ஸ்திரீக்கு’ சொன்னதிலிருந்து நாம் தெளிவாக கண்டு கொள்ளுகின்றோம்!

 சிலுவையில் மரித்த நம் அன்பின் நேசர், “தான் மரித்தாலும் பிழைத்திருப்பதை” முதன் முதலில் ஒரு பெண்ணுக்குத்தான் வெளிப்படுத்தினார்! அவளை துன்பப்படுத்தி, தினமும் அவளை சித்தரவதை செய்து கொண்டிருந்த 7 பிசாசுகளையும் கூட, அவர் அவளிடமிருந்து ஏற்கெனவே துரத்தியிருந்தார்!

 பெண் குலத்தின் பேரில், இரட்சகர் எத்தனை கரிசனையாக இருந்தார் என்பதற்கு அவர் சிலுவையில் தொங்கும் அந்த கடைசி நேரத்தில், தனது அருமை தாயாருக்கு, தனது அன்பான சீஷன் ஒருவனின் மூலமாகக் கொடுத்த ஜீவிய ஆதரவை நாம் காண்கின்றோம்!

 இந்தப் பாழ் உலகத்தில் ஆண், பெண் என்ற பாகுபாடுகள் இருப்பினும், நாம் நாடிச்செல்லும் பரலோகத்தில் அவை ஒன்றும் கிடையாது! அங்கே கொள்வனை, கொடுப்பனை எதுவும் இல்லை. அந்த பேரின்ப வீட்டில், நாம் எல்லாரும் தேவ தூதர்களாக மாற்றம் பெற்று, நமது ஆத்தும மணவாளனாம் இயேசுவை, என்றுமுள்ள சதாகாலங்களிலும் புகழ்ந்து போற்றி, பாடித் துதித்துக் கொண்டிருப்போம்! அல்லேலூயா.

- வாலிபம் இயேசுவுக்கே