மிலான் பட்டணத்தில் உள்ள புகழ்பெற்ற அழகான தேவாலயத்தின் முகப்பில் மூன்று நுழை வாயில்கள் உள்ளன. அதின் முதல் நுழை வாயிலில், ஒரு அழகான ரோஜா மலர் வளையம் சித்திரமாகச் செதுக்கப்பட்டு அதின் கீழாக “மனதிற்கு இன்பமோ? அது, ஒரு கண நேரம் மாத்திரமே!” என்று எழுதப்பட்டிருந்தது. இரண்டாவது நுழைவாயிலில், ஒரு சிலுவைச் சின்னம் செதுக்கப்பட்டு அதின் கீழாக “இவ்வுலகத்து பாடுகள் எல்லாம், சொற்ப காலமே!” என்று எழுதப்பட்டிருந்தது. தேவாலயத்துக்குள் நுழையும் பிரதான நுழைவாயிலின் மேலே “என்றும் நிலைத்திருக்கும் நித்தியமே நமது பிரதானம்!” என்று பெரிய எழுத்தில் எழுதப்பட்டிருந்தது.

“ஆத்துமாவைக் கொல்ல வல்லவர்களாயிராமல், சரீரத்தை மாத்திரம் கொல்லுகிறவர்களுக்கு நீங்கள் பயப்பட வேண்டாம், ஆத்துமாவையும், சரீரத்தையும் நரகத்திலே அழிக்க வல்லவருக்கே பயப்படுங்கள்” (மத்.10:28) என்று இரட்சகர் இயேசு தமது சீடர்களுக்குப் போதித்தார். மரணமானது ஒரு விசுவாசிக்கு நேரிடக்கூடிய ஒரு சம்பவம் மாத்திரமேதான். காரியம் இப்படியாய் இருக்க, தன் ஆத்துமாவைக் குறித்து அக்கறைப்படவோ இன்று அதிகம் பேர் இல்லை!

அல்லது, “உங்கள் ஆத்துமா, கவனம்!” என எச்சரிக்கும் ஆத்தும பாரம் கொண்ட உண்மை ஊழியர்களும் மங்கிப் போனார்கள்! நீயோ வாலிபனே, உன் ஆத்துமா விலையேறப்பட்டது என்பதை அறிவாயாக! உலக மோகம் உன்னை ஆண்டுகொண்டு, உன் நித்திய ஆத்துமாவை, இந்த உலகின் காலில் நசுங்க வைப்பது நியாயமா?..... இன்றே மனந்திரும்பி, உன் ஆத்துமா, இரட்சகர் இயேசுவால் இரட்சிக்கப்பட உன் உள்ளத்தை அவருக்குத் தருவாயாக!