ஓ, மானிடனே! இந்த முழு உலகத்தையும் ஏறெடுத்துப்பார்! குணமாக்கிட மருந்துகள் இல்லை, கண்டுபிடியுங்கள்! சீக்கிரமாய் கண்டுபிடியுங்கள்.... ஏன் தாமதம்? கிட்டத்தட்ட முழு உலகத்திலும் ஒரு லட்சத்திற்கும் அதிகமானோர் இந்த ‘கொரோனா’ வைரஸ் கிருமியால் அழிந்துவிட்டார்கள்.... “மருந்து எங்கே?” என்ற ஓலம் முழு உலகத்திலும் எதிரொலிக்கிறது! மருந்து ஆராய்ச்சி கூடங்கள் நிறைந்த மேலை நாடுகளாலும் ‘மருந்து’ கண்டுபிடிக்க முடியவில்லையே என சாமானிய மனிதர்களும் அதிர்ச்சியான வியப்படைந்து விட்டார்கள்!

“தேசத்தோர் பிணியைத் தீர்த்த மருந்து
தீர்க்கதரிசிகள் செப்பிய மருந்து!
அந்த குருமருந்தை
உம்பரத்தில் நான் கண்டேன்!”

என்ற ஆதி பக்தர்களின் பரவசம் இன்று நமக்கில்லையோ? கீழே ஆராய்ச்சியைவிட, விண்ணின் பரத்தை நோக்குவதல்லவோ “தேசத்தின் பிணியைப் போக்கும் குருமருந்து”. அன்றும், இன்றும், அந்த குருமருந்திற்காய் பரத்தை நோக்கினோர் யாவரும் பிழைத்திருக்கிறார்கள்! ‘கொரோனா’ என்ன? கொடிய விஷ சர்ப்பம் தீண்டினாலும், அவரைக்காண பரன் நோக்கியவர் யாவரும் பிழைப்பார்கள்! தேவனைத் தேடுவதும், முழங்காலிட்டு அண்ணாந்து பார்த்து கெஞ்சி ஜெபிப்பதும், நம்மிடையே ஒருவரிடமும் குறைந்துவிடக் கூடாது!

நம்முடைய மீறுதல்கள்! நம்முடைய அக்கிரமங்கள்! நமக்கு வர இருந்த ஆக்கினைகள்.... ஆகிய அனைத்தையும் தன்மேல் ஏற்று! நம்முடைய ‘மரண வியாதியை’ தானே ஏற்று.... நமக்கு வழங்கப்பட்ட ஒப்பற்ற குருமருந்து, நம் ஆண்டவர் இயேசு! நம்மை குணப்படுத்த, காயப்பட்டு பின்பு குணமடைந்த “அவருடைய தழும்புகளால் குணமாகிறோம்!” என நிரூபித்த இந்த குருமருந்து ஒன்றே, நம் தேசத்திற்கும், உலக நாடுகள் அனைத்திற்கும் பூரண சுகம் தந்திட முடியும்! (ஏசா.53:5). இந்த குருமருந்தை விசுவாசிப்பவன் எவனும் சுகமடைந்து, பிழைத்திருப்பான்!